شعب شايل صفاته

من اجمل ما خطت انامل الشاعر نهاد الخيكاني المقطوعة
حالة شعرية مصورة لواقع نعيشه ومعكم القصيدة

لو نفرض قنعنه انقسم الكاع
ست اجزاء خمسة خل نفرض اثنين
بما ان الحسين لكل الأطياف
يعني اشلون هم انقسم الحسين
ويا حلك الطائفية اتكتر ابعيد
خلص زادنه وشلنه المواعين
اشتظن وحسين صاير للوطن سور
الك خبزة بوطن ناطوره الحسين
وما دام بهالوطن ممدود الحسين
اذن عباس عدنه وعدنه جفين
ومو بغداد زينب عدنه بغداد
زينب واليحيطنها الصواوين
اذا ينمس خدرها انزعزع الكون
اعله حبها انفوق عابس بالسوادين
ولأن واحد وطنه اتحسده الأوطان
الواحد ما تقسمه ويطلع اثنين
واحد بس تشوفه بساعة العوز
خبز يتشطه بحلوك المساكين
ابن الأعظمية اتضيعه ساعات
تسئله الكاظمية وين ما وين
واذا بأربيل صخرة انكسرت بفاس
نكص جف الكسرها يهوس الطين
وياهو الكالك عدنه اختلافات
الهمسو بذانك لا يجذبون
تعاين للخريطة وانتبه زين
كل المعضلات براسك اتهون
تره دجلة وفرات عيون عباس
ومن اقصى الشمال اتصب العيون
تشرب ابن الرمادي وابن تكريت
وتشوف الشيعة آخر من يشربون
سمعت البصرة كالت شيعي عباس
منه السنة تشرب كبلي اشلون
ولا عباس كال انتم معازيب
بدينه الغرب واعليكم انمون
وامس هذا الأمس ما صارله هواي
اخذ هذا المثل بالعقل قيسه
لو ما جان جامع كبر الحسين
للسنة وحسينية وكنيسة
مو آنه وعمر نلطم على الراس
لحسين ويدك زنجيل عيسى
وامس هذا الامس ما صارله هواي
عثمان العبيدي اوهب حياته
مو لحظة خجل واستحه من الناس
الفاعل غيرته مو مستحاته
كض اللسان دجلة ودنه للكاع
لحد ما زوعه وطلع خواته
دجلة زاعهن مو جان شبعان
لكه عثمان واكفله بلهاته
والنعمان كبر فزع الناس
لأن جانن هذني مخدراته
وعلى جرف النهر هوس النعمان
شايل بيرغه وتفتل عباته
وانت احكم بعد نتفرق اشلون
اذا عدنه شعب هذي صفاته

اتمنى تنال اعجابكم ولكم تحيتي

بارك الله بك اخي شعر رائع جدا تحيتي لك

شكرا ايمان القلوب
حضورك مميز معي
تحية لك تصوغها حروفي المتواضعة

راااااائع
بارك الله بيك اخ المختار
يعطيك العافيه

الروعة بتواجدك وبصمتك هنا
اختي بنت اليمن