السراق في الحكومة العراقية شعر شعبي عراقي

يسرني انقل لكم هذه المساجلة التي حدثت بين شعراء منتدى البنفسج التابع لإتحاد الادباء الشعبيين متمنيآ ان تنال اعجابكم.



كاظم السماوي

لحد يدور احگوگه....عد الحكومه البوگه
مگرود يبقه ابن الوطن
حسباله حسباته انتهن
يعتقد زردومه اندهن
مايدري بس هالضوگه......عند الحكومه البوگه




حاتم الهاشمي
مگرود ابن الاهوار
وأبن النجف والانبار
بوگ ونهب للستار
والشعب نازل سوگه.....عند الحكومة البوگه

كاظم السماوي
نازل السوگ ومنعرف
ياحاتم اترك هلوصف
هسه الالف يلهم الف
والميت الف مسحوگه....عند الحكومه البوگه

كريم كاظم السعداوي
مكرود ياهذا الوطن
بالظيم عايش والمحن
ياهو اليحكمه بهالزمن
يلعب لعب بطروكه---عد الحكومه البوكه

ماجد الحلاوي
نشکي ولا واحد سمع
عیشونه بوهام وبدع
للثوب ماتنفع رگع
کلش چبیره شگوگه... عند الحكومه البوكَه

ماجد الحلاوي
إحنه اللي سلمنه الوطن
بيدين حسنه أم اللبن
حگ الفقير إبهل زمن
نامت عليه طابوگه... عند الحكومه البوكَه

كاظم السماوي
مسحوگ ظل هذا الشعب
طوبه اصبحوا بعد التعب
البرلماني بي لعب
وشبچه الهدف مشگوگه... عند الحكومه البوكَه

اسامة العبيدي
طعنه المنافق والخبل
وهواينه رخينه الحبل
ذيل الجلب ما ينعدل
لو بينه خير انسوكه....عد الحكومه البوكه

علي الغريب
من يوم سقطنه الصنم
ونجماته شالوهه العلم
لا طفل ..لا شاب السلم
سموم وسرت بعروكَه...عند الحكومه البوكَه
شنسوك اذا هوًّ انجلب
ماشايف وشاف العجب
عدنه حكومه بلا ادب
كل ميت الف خاشوكَه ...عند الحكومه البوكَه

علي الغريب
مظلوم من يومه الوطن
مّرنه أشكااال المحن
شكواته بس للهبقن
مسلوبه كل حكَوكَه....عند الحكومه البوكَه

باسم السماوي
مسكين ياشعب ألذرى
ردوك چنهـــــم للورى
باكَوك وعيـــونك ترى
أمريكا وي هل جوكَه .. عند ألحكومه ألبوكَه

علي الغريب
مرينه بيكم ياحـــــمد
مامش بعد شي أنحصد؟
كل ظنتي الظلم انوئد!
لابد طريقه نعوكَه ... عند الحكومه البوكَه

احمد الصالحي
يا كاظم او زاد البخل
والخل بعد ما ضلّه خل
حتى النهر عاف النخل
من كَطعوها اعثوكَه .. عند الحكومه البوكَه

حاتم الهاشمي
بيدين حسنه أم اللبن
احلامنه كلهه انتهن
صارت الغيرة ابلا ثمن
ويه اللبن مطروگه.....عند الحكومة البوگه

علي الغريب
غاب الضمير وما رجع
والشعب مل من الوجع
لغير الله صدك ما ركع
وحدوده ما مغلوكَه ...عند الحكومه البو كَه

احمد الصالحي
هاي الحكومه امخالفه
ما ظن بعد بيهه وفه
امبينه القضيّه امزيّفه
وبالكَصه هالمدكَوكَه .... عند الحكومه البوكَه

علي الغريب
شيجب عدلك ياعلي
شوف الوطن هالمبتلي
أرضي وصفت ماهي الي
ولا بيها الي طابوكَه ..... عند الحكومه البوكَه

حمودي الحياوي
الدسـتـور گِـلي شـوصه
گـطعــو علينه الحصـــه
والشـكــر بـاگــو نصــه
خلــونه بس انضوكََـــه .. عند الحكومه البوگــه

علي الغريب
رغم الجرى ياهالوطن
واهوالك الراحن وآجن
تبقى عراق النه حظن
عاشكَ وفي المعشوكَه .... عند الحومه البوكَه

حاتم الهاشمي
محروم كلش الشعب
نفط العرب مو للعرب
نركض ومامش بس تعب
واعصابنه محروگه.....عند الحكومة البوگه

علي الغريب
عين الوطن لتظن غفت
دم مو دمع هيه بجت
عالوالده المــــا قط شكت
شمعه وصفت محروكَه ....عند الحكومه البوكَه

احمد الصالحي
لا بعده ما فز الوطن
ولا شعبه للصاير فطن
من اذنك اشلع هالكَطن
دكَ الطبل داكَوكَه .. عند الحكومه البوكَه

اسامه العبيدي
معروف شعبي بعادته
مو اي بطن هالشالته
جانت الدنيه بعازته
كلهه ونطه من احكَوكَه ... عند الحكومه البوكَه
يابرلماني اسمع ولك
كبلَك على الكرسي هلك
ربك ابلحظه ايبدلك
يا جهرة العكَروكَه .. عند الحكومه البوكَه
جلال البطاط
هذه الشعب هم مبتلي
دايخ ويندب ياعلي
والله لحشم كل هلي
وثورة غضب معلوكَة...عند الحكومة البوكَة

جلال البطاط
ظلمة غدت يا هالربع

الواوي صايرلي سبع

صار الوطن للمنتفع

المالكي صاعد سوكََََة...عند الحكومة البوكََة

كاظم جابر السماوي
ريسهم ايحك كفشته
وبليس نافخ كرشته
بستوگه ظمهه اعله الشته
وينشد على البستوگه ..عند الحكومه البوگه



علي الغريب
لابد نغير هالوضع
والخير بالديره يشع
الحصه ماقط تنكَطع
الواحد عسل ريوكَه .... عند الحكومه البوكه
باسم ألسماوي
أتعلـّمت عالبــوكَـ ألربع
والچذب صار ألهم طبع
ينعدل كل هـــذا ألوضع
بثوره تظل معلوكَه.... عند ألحكومه ألبوكَه

علي الغريب
بالغربه أصبح هالشعب
والما تعب هسه تعب
كل المرار أهوا شرب
كيله طفح من شوكَه ... عند الحكومه البوكَه
مصطفى سينو

يعراق من يومك جرح
والحال شيعدله ويصح
الليل بيك بلا صبح
... عاشك بلا معشوكة...عند الحكومه البوكَه
باسم ألسماوي
لــو زين شفتـــه وتنتخب
بـس قاعة ألمجلس يطب
يتعلـــم ألبــوكَـــ وچـــذب
ألكَبله أعله ذني يسوكَه... عنــد ألحكومه البوكة
جلال البطاط

الشعب خدعو ونتخب

وضاعت السلة والعنب

مكرود ياهذا الشعب

اصوات العدل مخنوَََكة....عند الحكومة البوكة

محمد النصراوي

دلوني يا أهل الشرف
شنهو اللي باقي منلغف
عيشوا شعبنا بالشظف
حصروه بنص بستوكة ... عند الحكومة البوكة

جلال البطاط

ياناس ملينة الصبر

وجرح الوطن ماينجبر

الجرة بتونس لو مصر

كل طاغي راح يضوكة....عند الحكومة البوكة
:
:

والله يكون بعونه

بسم الله الرحمن الرحيم

( لا يغير الله ما بقوم حتى يغيروا ما بأ نفسهم ) صدق الله العلي العظيم



شكرا لك ميمي الامورة ...تحياتي لك

اللهم صل على محمد وآل محمد بارك الله بكم

اللهم صلي على محمدووآل محمد ان اللعناء من آل امية عدوا للشام الزينبي وهددو بهدم مرقدها لكن الغيارى دافعوا وذبوا عن مرقد سيدتهم بنت امير المؤمنين فدافعوا عن مقدساتكم ايها الشرفاء الاعزاء ولو بكلمة

بسم الله الرحمن الرحيم ان المنعطف التي تمر به الامة منعطف خطير لابد للفرد المسلم التنبه اليه لان الذي يقودونه يدعون الاسلام يخدعون الناس بهذا الادعاء ونحن وللاسف عندما نسمع كلمة اسلام نندهش نعم ان كلمة اسلام تدهش لكن لنجعل مرافق لكلمة الاسلام التمحيص اي لابد ان ننظر للكلام ونمحصه لعله حق يراد به باطل فاذا اصبحنا بهذه الكيفية من الصعب ان تنطلي علينا اكاذيب هذه الزمرة الفاسدة وسيكون اسلامنا العزيز بخير بابناءه البرره اللهم اجعلنا ممن يهتدي بهدي محمد وآل محمد