قصيدة مصر ياأم الدنيا شعر شعبي مصري

قصيدة مصر ياأم الدنيا شعر شعبي مصري

يسبق كلامنا سلامنا يطوف عالسامعين معنا
عصفور محندق يزقزق كلام موزون و له معنى
عن أرض سمرا و قمرا و ضفة و نهر و مراكب
و رفاق مسيرة عسيرة و صورة حشد و مواكب
في عيون صبية بهية عليها الكلمة و المعنى
مصر يمه يا بهية يام طرحة و جلابية
الزمن شاب و انتي شابة هو رايح و انتي جاية
جاية فوق الصعب ماشية فات عليكي ليل و مية
و احتمالك هو هو و ابتسامتك هي هي
تضحكي للصبح يصبح بعد ليلة و مغربية
تطلع الشمس تلاقيكي معجبانية و صبية يا بهية
الليل جزاير جزاير يمد البحر يفنيها
و الفجر شعلة هتعلى و عمر الموج ما يطويها
و الشط باين مداين عليها الشمس طوافة
ايدك في ايدنا ساعدنا دي مهما الموجة تتعافى
بالعزم ساعة جماعة و بالإصرار نخطيها
مصر يمه يا سفينة مهما كان البحر عاتي
فلاحينك ملاحينك يزعقوا للريح يواتي
اللي عالدفة صنايعي و اللي عالمجداف زناتي
و اللي فوق الصاري كاشف كل ماضي و كل آتي
عقدتين و التالتة تابتة تركبي الموجة العفية
توصلي بر السلامة معجبانية و صبية
و يعود كلامنا بسلامنا يطوف عالصحبة حلواني
عصفور محني يغني على الأفراح و من تاني
يرمي الغناوي تقاوي تبوس الأرض تتحنى
تفرح و تطرح و تسرح و ترجع تاني تتغنى
اللي بنى مصر كان في اﻷصل حلواني

الشاعر

أحمد فؤاد نجم

» شعر مصري شعبي رومانسي ومضحك
» شعر مصري شعبي تحشيش على الحب
» عيدالغدير قصيدة شعر شعبي جميل
» قصيدة الامام علي بن ابي طالب النفسُ تبكي على الدنيا وقد علمت حكمة رائعة
» تحشيش مصري جديد محشش مصري هع هع