اضل لهالعصر شاهد الشاعر عريان سيد خلف شعر شعبي رائع

اضل لهالعصر شاهد الشاعر عريان سيد خلف شعر شعبي رائع

الشاعر عريان سيد خلف



بعد بيه الصبر واجد ..
يشب بيه المكابر نار تلهم باث ..
يگضيني الشرار وطبعي اضل بارد ..
ازم شفه اعله شفه ..
وناب يخلف ناب ..
كل واحد شكل وصوابهن واحد ..
مگالب والليالي تريد وسعة بال ..
وهموم العلي .. ما مرن بواحد ..
كفاني اترفعت عن چلمة الياحيف ..
وسهمي شما نگص من هالوكت زايد ..
اكابر عالنزف ..
حد وشلة النتاك ..
دامنته .. وجزِت .. لاجبر ولا شد ..
گبل مهرة احلامي ..
تضل باثرها الخيل ..
هسه .. اشما اعسها .. امحدده اتحدد ..
ومشاچچ زماني وياي .. عين بعين ..
اتمهمز الگومه .. وصاح بيه اگعد ..
حجرني الصبر .. لاسمِح لا مغتاض ..
حالي لحالتي .. لا وادد ولا ضد ..
لا ملگه اليدب بالروح ..
دفگة روح ..
ولا عصرة حزن .. للراد عني يصد ..
خلها شما تصح .. خنياب لو صيهود ..
طيبت النفس ..
لا طير ولا سِد ..
لا طيب الحليب .. يحرك الوجدان ..
ولا صاحب وفي لعند الضنك ينشد ..
بس مجمع عجارب .. ويل للغفلان ..
تتناوبه ابسمها .. وبالعجل تلبد ..
صحبة ليل كاس .. وكهكهة غمان ..
محاببهم چذب ومزاحهم بارد ..
عمت عين الليالي .. وهجم بيت الموت ..
يتخطه الرعيع .. وياخذ الماجد ..
دنيه ولا وحتني .. املاوح السرحان ..
غشتني ابهداها .. وباگت الواحد ..
وبعد بيه الصبر واجد .. اضل لهالعصر شاهد ..
واصفهم بالقصايد .. واحد الواحد ..
واطشرهم .. ولمهم .. واحسب الف حساب ..
ونگي الثوب الابيض من ردى الفاسد