نضال حسن الحاج أنا بكرهك

الشاعرة
نضال حسن الحاج /ماهي الا انثى ذات احساس مرهف ترجمت كل احسيساها الي كلم
جميل لة معاني رائعة درات معضم قصائدها حول واقع ملموس ان لم يكن بالنسبة
الينا فبالنسبة لها وان لم ابالغ في قولي ما هي الا قمة اخرجتها ولاية
الجزيرة مدينة المناقل فالادعكم لتحكمو على مايخرج من اقلام تلك الرائعة

بس بكرهك..!
انا بكره اليوم الصنع قلبا يكورك ويندهك
انا بكره الوطن البلم شرف الغرام المنتهك
من ياتو باب طليت علي ما كنت اصلا بشبهك
انا بكرهك
انا شلت ريدك في القليب وسقيتو من دم العروق
صنقعت دليت النجم دنقرت كبيت نور وشوق
وعصرت موية الانتظار ختيتا في وجع الحروق
وكان النتيجة تبيع هوي هو اريتو كان سويتلو سوق
انا بكرهك
من وين اجيب ليك الدموع
من وين اصنقر حيل كلام كان امنيات قلبو الرجوع
من وين اذا هتك الضلام حيل خيلي القالك شموع
لكني مجبور اطردك واقفل وراك باب الضلوع
شديت رحالاتي ومشيت وكتين هتك حيلك هواي
ارتحت في موجي ورسيت
لا حرك الموج البحر
لا صد قلبي ولا قسيت لكن طلعت خيال عشم
ضمخ رؤى الوجع المميت
انا بكرهك
قدر اشتهاي
انا بكرهك
قدر الغرام الكان زمان كابت مساماتي وهواي
انا بكرهك
قدر اني ما لودت بيك كريات شراييني ودماي
انا بكرهك
قدر اني غنيتك غناي
من وين دخلت علي مدن شاخت من الوجع الاليم
من وين طرقت جدار قلب لقح هوى العشق العقيم
من وين سخت شمسك علي
كانت سماي مليانة غيم
فتق جراحــاتي
فتق جراحاتي وامش
خليني في لهب الجحيم
انا قلت ليك..
انا بكرهك
قدر المواسم الشادة خيل الريد عليك
انا بكرهك
قدر المصائب الحارسة بوابات مجيك
انا بكرهك
نفس المساحة وحجم قلبي الكان تملي بيشتهيك
بقى بكرهك
واتوكل ارحل مني فوت
حرمان علي قلبي الكلام
كان غيرك اجتاحو السكوت
خليهو قلبي الاندفن
تنسج عليه العنكبوت
اوخلي.... من بعدك يموت
الموت اخير......
من اني افضل
في رحابك وفي رجاك
انا كنت لو غاب القمر دائما بضوي
ضلام دناك
وانا كنت لو غيمك رحل
بطلع عشان اسكن سماك
وانا كنت لو بردك نزل
بوقد صوابعي لهب حداك
لكن منو القدر كدا
والله لو انا في محلك
بنسج الشمس احترام
واهديها ليك متمددة
بفتح كراريس الكلام
اختار حروفي واجردا
بنبش قبور المستحيل
كلمات شكر متفردا
لكن خسارة على قلب
حباك بلا ما يعرفك
انعل ابو القلم العلي دفتر غناك دمو انسفك
انعل ابو الشعر الغشاني وغنى فيك والفك
منعول غناي
منعول غناي كان ما امتطيت خيلي وبقيت اتاسفك
بتاسفك وكتين عيوني بسوقن الشوق لي انتظارك
لما ليلي يسوق محاسنو وينهزم عندك نهارك
لما ابكي انهزامي عشان ابارك انتصارك
لما كوكبي ساب مدارو رحل عشان يسكن مدارك
كنت مالي زمان ومالك
لكن وحاتك بكرهك
ندمان
ندمان على عمرا معاك ضيعتو
ضيعتو في غفلة زمن
ندمان علي
دمعا سكبتو على رضاك بلا تمن
انا كنت بحلم في وجودك ينكسر خاطر الشجن
لكن رضاي عليك عشم ابليس قصاد جنة عدن
انا بكرهك
كلما يطول ليلي ويواتيه العذاب
انا بكرهك
كل ما القلم يركب مصاعب الدنيا
يمشي على الكتاب
انا بكرهك
كل ما الفراق كتل مضامين العشق سدالو باب
انا بكرهك
قدر العيون ما تلبس التوب الزراق
تتوضأ موية الانتحاب
انا بكرهك
من كل باب انا بكرهك
واتوكل ارحل من جواي
غلطان اذا قلبك هداك قال ليك حا تفضل غناي
غلطان اذا عقلك رضخ لي ظن يقول انك حداي
والله ما فارق معاي
انا كنت ناوي اجملك
بس كنت ناوي اجملك
وامسك مضامين اللغات
من فيض حروفي اكملك
ترحل علي درب العشم
بي زاد هواي احملك
وكتين اخش قلبك جرا
واقطع قليبي وادملك
ندمان منو
انا غايتو ما ندمان عليك
اتوكل ارحل من جواي عيش العذاب الباقي فيك
ولو قلبك اتجرأ رجع
حقك تلومو علي مجيك
شان قلبي انت مليتو دم
ياخ قلبي انت مليتو دم
ما عادلو باقي يسبو ليك
على كل حال
انا بكرهك
عدد الحصى وعدد الرمال
انا بكرهك
عدد الصواب والاحتمال
انا بكرهك
عدد الحقائق والخيال
انا بكرهك
عدد الشنة وعدد الجمال
انا بكرهك
عدد الاجابات والسؤال
انا ابكرهك
عدد الشعر ماسنة سيف الارتجال
انا بكرهك
عدد اللي ممكن والمحال
انا بكرهك
عدد ما زمان قت ليك تعال
انا بكرهك

مستورة حالي وراك وفوت
يا دابو ليلك همو طال
مستورة حالي وراك وفوت
يا دابو ليلك همو طال
عاى كل حال
انا بكرهك

شكرا لك على الموضوع اخي

» أبوي للشاعره نضال حسن الحاج
» قصيده للشاعره المبدعه نضال حسن الحاج
» واحسيناه الحاج باسم الكربلائي
» كل كطرة دم بشرياني الحاج باسم الكربلائي
» غيابٌ باتَ يبكينا الحاج أنور الكاظمي